:: Concello de Láncara

Láncara acolleu os actos oficiais e unha asemblea extraordinaria da Real Academia
Ramón Piñeiro López acaparou todo o protagonismo no municipio que o viu nacer, Láncara, onde se lle tributou unha homenaxe coincidindo coa celebración do Día das Letras Galegas.

O presidente do Consello da Cultura Galega, Ramón Villares, esbozou o semblante deste singular galeguista durante a súa intervención na asemblea extraordinaria da Real Academia Galega, que se celebrou no centro multifuncional do concello. Nin a choiva nin a feira desdebuxaron os actos conmemorativos, que non se perderon o presidente da Xunta, Alberto Núñez Feijóo, nin a presidenta do Parlamento Galego, Pilar Rojo, o delegado do Goberno, Antón Louro, ou outros moitos alcaldes da comarca lucense.
“Era e é un campesiño ilustrado”. Así o describía unha densa disertación de Ramón Villares, quen tamén recalcou o papel do intelectual lancarino como o “dun pioneiro dunha nova idea de Galicia”. “A lingua é a sangue do espírito”, parafraseaba Villares na súa intervención sobre Piñeiro, do que bosquexou que foi “unha persoa modesta e dunha extracción humilde”.
Pola súa banda, Víctor Freixanes, presidente de Galaxia, editorial que fundou o homenaxeado, resumiu deste o concepto dunha Galicia “máis consciente de si mesma”.
Nun salón abarrotado transcurriu esta asemblea extraordinaria. Xa pola tarde, ás cinco, celebrouse a ofrenda floral, coa presenza tamén de familiares de Piñeiro, como o seu irmán Aníbal, que non faltou a ningunha das actividades programadas dende o venres.
Na súa intervención nestes actos, Núñez Feijóo salientou que esta era a súa primeira visita oficial a un concello dende que chegou á Presidencia da Xunta.

Un autor que asociou idioma, liberdade e entendemento
O mandatario galego considerou que a mensaxe de Ramón Piñeiro chega “tan fondo” porque, dixo, “non fire”. En palabras do presidente, Piñeiro “foi quen de asociar idioma, liberdade e entendemento” e axudou a facer da lingua “un vencello, unha rede espiritual”. “Grazas a iso –engadiu-, achegou o idioma a xentes que tiñan esquecido ese ser aldeano que latexa en todos os homes desta terra”.

No seu discurso, Núñez Feijóo eloxiou a figura deste escritor e filósofo lancarao do que salientou que nos falou “coma un pai máis que coma un líder”, que transmitiu “tolerancia, non xenreira”, e que “non falou a masas indiferenciadas, senón a persoas nas que vía a un veciño máis do seu rueiro”. En síntese, “non procurou a gloria, pero construíu unha comunidade”, recalcou o presidente.

O xefe do Executivo galego, lembrou cómo a vila natal deste escritor foi protagonista na súa obra, na que reflexiona sobre Galicia “como fogar europeo e universal”. Evocou unhas verbas deste galeguista nas que se pregunta se unha das tarefas dos galegos é mostrar a Europa a liberdade espiritual, a arte como ideal humano e o humor como sabedoría suprema; para concluír que Piñeiro “estaba recuperando a misión que Galicia emprendera moito tempo atrás co Camiño de Santiago”.

“A obra que Piñeiro deixou en persoas, máis que en libros, non se entende sen Láncara, a gran historia do pensamento galego non se entende sen outras Láncaras que serven de sustento espiritual aos seus autores”, considerou o titular da Xunta. “Todos temos, e eu desde logo tamén, unha Láncara onde gardamos os aloumiños dos nosos pais e as primeiras palabras oídas nunha lingua galega que temos asociada ao cariño”, enfatizou. Igual que Ramón Piñeiro, agregou, “necesitamos volver sempre a ese espazo primixenio para orientarnos no complexo mundo no que vivimos”.

O Alcalde de Láncara agradecu a colaboración de toda a Corporación Municipal , a elección de Láncara pola Real Academia da Lingua Galega na celebración dos actos así como a presenza das diferentes autoridades,especialmente do Presidente da Xunta de Galicia e de todo o seu goberno.